Датировка катренов Нострадамуса и акварелей «Потерянной книги» - Илья Разумов

11. Et sera faicte grande paix vnion & concorde entre vng des enfans des fronts esgarez & separez par diuers regnes, & sera faicte telle paix que demeurera attaché au plus profond baratre le suscitateur & promoteur de la martiale faction par la diuersite des religieux, & sera vny le Royaume du Rabieux: qui cotrefera le sage. Et les contrees, villes, citez, Regnes, & prouinces qui auront delaissé les premieres voyes pour se deliurer se captiuant plus profondement seront secrettement fachéz de leur liberté, & parfaicte religion perdue, commenceront de frapper dans la partie gauche, pour torner à la dextre, & remettant la saincteté profligee de long temps auec leur pristin escript, qu'apres le grand chien sortira le plus gros mastin, qui fera destruction de tout, mesmes de ce qu'auparauant sera esté perpetré, seront redresséz les temples comme au premier temps, & sera restitué le clerc a son pristine estat, & commencera a meretricquer & luxurier, faire & comettre mille forfaicts.

12. Et estant proche d'vne autre desolation, par lors qu'elle sera a sa plus haute & sublime dignité se dresseront de potentats & mains militaires & luy seront ostez les deux glaiues, & ne luy demeurera que les enseignes, desquelles par moyen de la curuature qui les attire, le peuple le faisant aller droict, & ne voulant se condescendre a eux par le bout opposite de la main aigue, touchant terre, vouldront stimuler iusques a ce, que naistra d'vn Rameau de la sterille, de long temps, qui deliurera le peuple vniuers de celle seruitude benigne & volontaire, soy remettant a la protection de Mars, spoliant Iupiter de tous ses honeurs & dignitez, pour la cité libre, constituee & assise dans vne autre exigue Mezopotamie.

13. Et sera le chef & gouuerneur ietté du milieu, & mis au hault lieu de l'air, ignorant la conpiration des coniurateurs, auec le second Trasibulus, qui de long temps aura manié tout cecy, alors les immundicitez, les abominations seront par grande honte obiectees & manifestees aux tenebres de la lumiere obtenebre, cessera deuers la fin du changement de son regne, & les chiefs de l'Eglise seront en arriere de l'amour de Dieu, & plusieurs d'entre eux apostateront de la vraye foy, & des trois sectes, celle du milieu, par les culteurs d'icelle, sera vn peu mis en decadence. La prime totallement par l'Europe, la plus part de l'Affrique exterminee de la tierce, moyennant les poures d'esprit, que par insensez esleuez par la luxure libidineuse adultereront.

14. La plebe se leuera soustenant, dechassera les adherans des legislateurs, & semblera que les regnes affoiblis par les Orientaux que Dieu le Createur aye deslié Satan des prisons infernalles, pour faire naistre le grand Dog & Dohan, lesquels seront si grande fraction abominable aux Eglises, que les rouges ne les blancs sans yeux ne sans mains plus n'en iugeront. Et leur sera ostee leur puissance alors sera faicte plus de persecution aux Eglises, que ne fut iamais, et sur ces entrefaictes naistra la pestilence si grande que des trois pars du monde plus que les deux defaudront. Tellement qu'on ne se scaura, ne cognoistra les appartenans, des champs & maisons, & naistra l'herbe par les rues des cites plus haute que les genoux. Et au clerge sera faicte totalle desolation, & vsurperont les Martiaux ce que sera retourné de la cité du Soleil de Melite, & des isles Stecades, & sera ouuerte la grand cheyne du port qui prend sa denomination au boeuf marin. Et sera faite nouuelle incursion par les maritimes plages, vollant le sault Castulum deliurer de la premiere reprinse Mahumetane. Et ne seront du tout leurs assaillimens vains, & au lieu que iadis fut l'habitation d'Abraham, sera assaillie par personnes qui auront en veneration les Iouialistes.

15. Et icelle cité d'Achem sera enuironnee, & assaillie de toutes parts en tresgrande puissance de gens d'armes. Seront affoiblies leurs forces maritimes par les Occidentaux, et a ce regne sera faicte grande desolation, & les plus grandes citez seront depeuplees, & ceux qui entreront dedans seront comprins a la vengeance de l'ire de Dieu. Et demeurera le sepulchre de tant grande veneration par l'espace de long temps soubs le serain a l'vniverselle vision des yeux du Ciel, du Soleil, & de la Lune, et sera conuerty le lieu sacré en ebergement de troupeau menu & grand, & adapté en substances prophanes. O quelle calamiteuse affliction sera par lors aux femmes enceintes: & sera par lors du principal chef Oriental, la plus part esmeu par les Septentrionaux & Occidentaux vaincu, & mis a mort, profligez, & le reste en fuite, & ses enfans de plusieurs femmes emprisonnez, & par lors sera accomplie la Prophetie du Royal Prophete: Vt audiret gemitus compeditorum, vt solueret filios interemptorum.

16. Quelle grande oppression que par lors sera faicte sur les Princes & gouuerneurs des Royaumes, mesmes de ceux qui seront maritimes & Orietaux, & leurs langues entremeslees a grande societé: la langue des Latins & des Arabes par la communication Punique, & seront tous ces Roys Orientaux chassez profligez, exterminez, non du tout par moyen des forces des Roys d'Aquilon & par la proximité de nostre siecle par moyen des trois vnys secrettemet cherchant la mort, & insidies par embusches l'vn de l'autre, & durera le renouuellement de Triumuirat sept ans, que la renommee de telle secte fera son estendue par l'vnivers, & sera soustenu le sacrifice de la saincte & immaculee hostie: & seront lors les Seigneurs deux en nombre d'Aquilon, victorieux sur les Orientaux, & sera en iceux faict si grand bruit & tumulte bellique, que tout iceluy Orient tremblera de l'effrayeur d'iceux freres, non freres Aquilonaires.

17. Et pour ce, Sire, que par ce discours ie mets presque confusement ces predictions, & quant ce pourra estre & l'aduenement d'iceux, pour le denombrement du temps que s'ensuit, qu'il n'est nullement ou bien peu conforme au superieur: lequel tant par voye Astronomique, que par autres, mesmes des sacrees escritures, qui ne peuuent faillir nullement, que si ie voulois a vn chacun quatrain mettre le denombrement du temps, se pourroit faire: mais a tous ne seroit agreable, ne moins les interpreter iusques a ce Sire, que vostre Maiesté m'aye octroyé ample puissance pour ce faire, pour ne donner cause aux calomniateurs de me mordre.

18. Toutesfois comtans, les ans depuis la creation du monde, iusques a la naissance de Noe, sont passez mille cinq cens & six ans, & depuis la naissance de Noe iusques a la parfaicte fabrication de l'arche, approchant de l'vniuerselle inundation, passerent six cens ans, si les dons estoyet Solaires ou Lunaires, ou de dix mixtions. Je tiens ce que les sacrees escriptures tiennent qui estoyent Solaires. Et a la fin d'iceux six cens ans Noe entra dans l'arche pour estre saulué du deluge: & fut iceluy deluge vniuersel sur la terre, & dura vn an & deux mois. Et depuis la fin du deluge iusques a la natiuite d'Abraham, passa le nombre des ans de deux cens nonante cinq. Et depuis la natiuité d'Abraham iusques a la natiuite d'Isaac passerent cent ans. Et depuis Isaac iusques a Iacob, soixante ans, des l'heure qu'il entra en Egypte iusques a l'yssue d'iceluy passerent cent trente ans. Et depuis l'entree de Iacob, en Egypte iusques a l'issue d'iceluy, passerent quatre cens trente ans. Et depuis l'yssue d'Egypte iusques a l'edification du Temple faicte par Salomon au quatriesme an de son regne, passerent quatre cens octante ou quatre vingts ans. Et depuis l'edification du temple iusques a Iesus Christ selon la supputation des hierographes, passerent quatre cens nonante ans. Et ainsi par ceste supputation que i'ay faicte colligee par les sacres lettres, sont enuiron quatre mille cent septante trois ans & huict mois, peu ou moins. Or de Iesus Christ en ca par la diuersité des sectes, se ie laisse & ayant supputé & calculé les presentes Propheties, le tout selon l'ordre de la chaisne qui contient sa revolution, le tout par doctrine Astonomique, & selon mon naturel instinct, & apres quelque temps & dans iceluy comprenant depuis le temps que Saturne qui tournera entrer a sept du mois d'Auril, iusques au 25. d'Aoust Iupiter a 14. de Iuin iusques au 7. d'Octobre, Mars depuis le 17. d'Auril iusques au 22. de Iuin, Venus depuis le 9. d'Auril iusques au 22. de May, Mercure depuis le 3. de Feurier iusques au 27. dudit. En apres du premier de Iuin iusques au 24. dudit, & du 25. de Septembre iusques au 16. de Octobre, Saturne en Capricorne, Iupiter en Aquarius, Mars en Scorpio, Venus en Pisces, Mercure dans vn moys en Capricorne, Aquarius & Pisces, la Lune en Aquarius, la teste du Dragon en Libra: la queue a son signe opposite suyuant vne conionction de Iupiter a Mercure auec vn quadrin aspect de Mars a Mercure, & la teste du Dragon sera auec vne conionction du Soleil a Iupiter, l'annee sera pacifique sans eclypse, & non du tout, — & sera le commencement comprenant ce de ce que durera & comencant icelle annee sera faicte plus grande persecution a l'Eglise Chrestienne, que n'a esté faicte en Afrique, & durera ceste icy iusques, a l'an mil sept cens nonante deux que l'on cuydera estre vne renouation de siecle:

19. apres commencera le peuple Romain de se redresser, & dechasser quelques obscures tenebres, receuant quelque peu de leur pristine clarté, non sans grande diuision & continuel changemens, Venise en apres en grande force & puissance leuera ses aisles si tres haut, ne disant gueres aux forces de l'antique Rome, et en iceluy temps grandes voyles Bisantines associees aux Ligustiques par l'appuy & puissance Aquilonaire, donnera quelque empeschement que des deux Cretenses ne leur sera la foy tenuee. Les arcs edifiez par les antiques Martiaux, s'accompagneront aux ondes de Neptune.

20. En l'Adriatique sera faicte discorde grande, ce que sera uny sera separé, approchera de maison ce que paravant estoit & est grande cité, comprenant le Pempotam la Mesopotamie de l'Europe a quarante cinq & autres de quarante vn, quarante deux, & trente sept, et dans iceluy temps, & en icelles contrees la puissance infernale mettra à l'encontre de l'Eglise de Iesus Christ la puissance des aduersaires de sa loy, qui sera le second Antechrist, lequel persecutera icelle Eglise & son vray Vicaire, par moyen de la puissance des Roys temporels, qui seront par leur ignorance seduits par langues, qui trencheront plus que nul glaiue entre les mains de l'insense. Le susdicts regne de l'Antechrist ne durera que iusques au definement de ce nay pres de l'aage & de l'autre a la cité de Plancus accompagnez de l'esleu de Modene Fulcy, par Ferrare maintenu par Liguriens Adriaticques, & de la proximité de la grande Trinacrie. Puis passera le mont Iouis, Le Gallique ogmium, accompagné de si grand nombre que de bien loing l'Empire de la grande loy sera presenté, & par lors & quelque temps apres sera espanché profuseement le sang des Innocens par les nocens vn peu esleuez, alors par grands deluges la memoire des choses contenues de tels instrumens receura innumerable perte, mesmes les lettres: qui sera deuers les Aquilonaires par la volonté diuine, & entre vne fois lié Satan.

21. Et sera faicte paix vniuerselle entre les humains, & sera deliuree l'Eglise de Iesus Christ de toute tribulation, combien que par les Azos-tains voudroit mesler dedans le miel du fiel, & leur pestifere seduction: & cela sera proche du septiesme millenaire, que plus le sanctuaire de Iesus Christ ne sera conculqué par les infideles qui viendront de l'Aquillon, le monde approchant de quelque grande conflagration, combien que par mes supputations en mes propheties, le cours du temps aille beaucoup plus loing. Dedans l'Epistre que ces ans passez ay dedie a mon fils Cesar, Nostradamus i'ay assez appertement declare aucuns poincts sans presage. Mais icy, o Sire, sont comprins plusieurs grands & merueillieux aduenemens, que ceu qui viendront apres le verrot.

22. Et durant icelle supputation Astrologique, conferee aux sacrees lettres, la persecution des gens Ecclesiastiques prendra son origine par la puissance des Roys Aquilonaires, vnis auec les Orientaux, et celle persecution durera onze ans, quelque peu moins, que par lors defaillira le principal Roy Aquilonaire, lesquels ans accomplis suruiendra son vny Meridional, qui persecutera encore plus fort par l'espace de trois ans les gens d'Eglise, par la seduction apostatique, d'vn qui tiendra toute puissance absolue a l'Eglise militaire, & le sainct peuple de Dieu obseruateur de sa loy, & tout ordre de religion sera grandement persecuté & affligé tellement que le sang des vrais Ecclesiastiques nagera par tout, & vn des horribles Roys temporels par ses adherans luy seront donnes telles louanges, qu'il aura plus respandu de sang humain des innocents Ecclesiastiques, que nul ne scauroit auoir du vin, & iceluy Roy commetra des forfaicts enuers l'Eglise incroyables, coulera le sang humain par les rues publiques & temples, comme l'eau par pluye impetueuse, & rougiront de sang les plus prochains fleuues, & par autre guerre nauale rougira la mer, que le rapport d'vn Roy a l'autre luy sera dit: Bellis rubuit naualibus aequor. Puis dans la mesme annee & les suiuantes s'en ensuiura la plus horrible pestilence, & la plus meruelleuse par la famine precedente, & si grandes tribulations que iamais soit aduenue telle depuis la premiere fondation de l'Eglise Chrestienne, & par toutes les regions Latines, demeurant par les vestiges en aucunes contrees des Espaignes.

23. Par lors le tiers Roy Aquilonaire entendant la plaincte du peuple de son principal tiltre, dressera si grande armee, & passera par les destroits de ses derniers auites & bisayeulx, qui remettra la plus part en son estat, & le grand Vicaire de la cappe sera remis en son pristin estat: mais desolé, & puis du tout abandonné, & tournera estre Sancta Sanctorum destruicte par Paganisme & le vieux, & nouueau Testament seront dechassez, bruslez, en apres l'Antechrist sera le prince infernal, encores par la derniere foy trembleront tous les Royaumes de Chrestienté & aussi des infideles, par l'espace de vingt cinq ans, & seront plus grieues guerres & batailles, & seront villes, citez chasteaux, & tous autres edifices bruslez, desolez, destruicts, auec grande effusion de sang vestal, mariees, & vefues violees, enfans de laict contre les murs des villes allidez & brisez, & tant de maux se commettront par le moyen de Satan, prince infernal, que presque le monde vniuersel se trouuera defaict & desolé: & auant iceux advenemens aucuns oyseaux insolites crieront par l'air, Huy huy, & seront apres quelques temps esuanouys. Et apres que tel temps aura dure longuement, sera presque renouuellé vn autre regne de Saturne, & siecle d'or, Dieu le createur dira entendant l'affliction de son peuple, Satan sera mis & lié dans l'abysme du barathre dans la profonde fosse: & adoncques commencera entre Dieu & les hommes vne paix vniuerselle, & demeurera lié enuiron l'espace de mille ans, & tournera en sa plus grande force, la puissance Ecclesiastique, & puis tourne deslié.

24. Que toutes ces figures sont iustement adaptees par les diuines lettres aux choses celestes visibles, c'est a scavoir, par Saturne, Iupiter, & Mars, & les autres conioincts, comme plus a plain par aucuns quadrins l'on pourra voir. Ie eusse calculé plus profondement, & adapté les vns auecques les autres. Mais voyant o Serenissime Roy, que quelqu'vns de la sensure trouueront difficulté, qui sera cause de retirer ma plume a mon repos nocturne: Multa etiam, o rex omnium potentissime, praeclara et sane in breui ventura, sed omnia in hac tua epistola innectere non possumus, nec volumus: sed ad intelligenda quaedam facta horrida fata, pauca libanda sunt, quamuis tanta sit in omnes tua amplitudo et humanitas homines, deosque pietas, vt solus amplissimo et Christianissimo Regis nomine, et ad quem summa totius religionis auctoritas deferatur dignus esse videare. Mais tant seulement ie vous requiers, o Roy tres clement; par icelle vostre singuliere & prudente humanité, d'entendre plus tost le desir de mon courage, & le souuerain estude que i'ay d'obeyr a vostre Serenissime Maieste, depuis que mes yeux furent si proches de vostre splendeur Solaire, que la grandeur de mon labeur n'attainct ne requiert.