Библия (на цсл. гражданским шрифтом) - Сборник

20 И се, аз послю ангела моего пред лицем твоим, да сохранит тя на пути, яко да введет тя в землю, юже уготовах тебе:

21 вонми себе и послушай его, и не ослушайся его: не обинется бо тебе, имя бо мое есть на нем:

22 аще слухом послушаеши гласа моего и сотвориши вся, елика аз заповедаю тебе, и сохраниши завет мой, будете ми люди избранни от всех язык: моя бо есть вся земля, вы же будете ми царское священие и язык свят. Сия словеса да речеши сыном израилевым. Аще слухом послушаеши гласа моего и сотвориши вся, елика реку тебе, враг буду врагом твоим и сопротивлюся сопротивником твоим.

23 Пойдет бо ангел мой наставляяй тя и введет тя ко аморрею и хеттею, и ферезею и хананею, и гергесею и евею и иевусею, и потреблю их (от лица вашего):

24 да не поклонишися богом их, ниже послужиши им: да не сотвориши по делом их, но разорением разориши и сокрушением сокрушиши капища их,

25 и да послужиши Господу Богу твоему: и благословлю хлеб твой и вино твое и воду твою, и отвращу болезнь от вас.

26 Не будет безчаден, ниже неплоды на земли твоей: число дний твоих исполняя исполню.

27 И страх послю ведущий тя, и устрашу вся языки, в няже ты входиши к ним, и дам вся сопротивники твоя в бегуны:

28 и послю шершни пред тобою, и изжену аморреи и евеи, и иевусеи и хананеи и хеттеи от тебе:

29 не изжену их в лете единем, да не будет земля пуста, и мнози будут на тя звери земнии:

30 помалу помалу изжену их от тебе, дондеже возрастеши и наследиши землю.

31 И положу пределы твоя от чермнаго моря до моря филистимля, и от пустыни до реки великия евфрата, и предам в руце ваши седящих на земли и изжену их от тебе:

32 да не смесишися с ними, и с боги их да не завещаеши завета,

33 и да не останутся на земли твоей, да не сотворят тя согрешити ко мне: аще бо поработаеши богом их, сии будут тебе в соблазн.

Глава 24

1 И моисею рече: взыди ко Господу ты и аарон, и надав и авиуд и седмьдесят старец израилевых, и да поклонятся издалече Господу:

2 и да приступит моисей един к Богу, они же да не приступят: и людие с ними да не взыдут.

3 Прииде же моисей и поведа людем вся словеса Божия и оправдания. Отвещаша же вси людие гласом единым, глаголюще: вся словеса, яже глагола Господь, сотворим и послушаем.

4 И написа моисей вся словеса Господня: обутрев же моисей заутра, созда олтарь под горою, и дванадесять камений в дванадесять племен израилевых:

5 и посла юношы сынов израилевых, и принесоша всесожжения, и пожроша жертву спасения Господу Богу телцы.

6 Взем же моисей половину крове, влия в чашы, половину же крове возлия на олтарь,

7 и взем книгу завета, прочте людем во ушы. И рекоша: вся, елика глагола Господь, сотворим и послушаем.

8 Взем же моисей кровь, окропи люди и рече: се, кровь завета, егоже завеща Господь к вам о всех словесех сих.

9 И взыде моисей и аарон, и надав и авиуд и седмьдесят от старец израилевых,

10 и видеша место, идеже стояше Бог израилев: и под ногама его яко дело камене сапфира, и яко видение тверди небесныя чистотою.

11 И от избранных израилевых не повредися ни един: и явишася на месте Божии, и ядоша, и пиша.

12 И рече Господь к моисею: взыди ко мне на гору и стани тамо, и дам ти скрижали каменныя, закон и заповеди, яже написах законоположити им.

13 И востав моисей и иисус предстоявый ему, взыдоша на гору Божию

14 и старцем реша: пождите в молчании зде, дондеже возвратимся к вам: и се, аарон и ор с вами: аще кому случится суд, да идут к ним.

15 И взыде моисей на гору, и покры облак гору,

16 и сниде слава Божия на гору синайскую, и покры ю облак шесть дний. И воззва Господь моисеа в день седмый из среды облака:

17 обличие же славы Господни, яко огнь пламенуя на версе горы, пред сыны израилевы.

18 И вниде моисей в среду облака и взыде на гору, и бе тамо на горе четыредесять дний и четыредесять нощей.

Глава 25

1 И рече Господь к моисею, глаголя:

2 рцы сыном израилевым, и да возмут ми начатки от всех, яже угодна будут сердцу их, да возмете начатки моя.

3 Сей же есть начаток, егоже возмете от них: злато и сребро и медь,

4 и синету и багряницу, и червленицу сугубу (пряденую), и виссон сканый, и власы козия,

5 и кожы овни очервленены, и кожы сини, и древа негниющая,

6 и елей в свещение, фимиам во елей помазания и в сложение фимиама,

7 и камени сардийския, и камени в ваяние на епомиду и подир.

8 И да сотвориши ми освящение, и явлюся в вас:

9 и сотвориши ми по всему, елика аз покажу тебе на горе, образ скинии и образ всех сосудов ея: сице да сотвориши.

10 И сотвориши кивот свидения от древ негниющих, двою лактий и пол в долготу, и лактя и пол в широту, и лактя и пол в высоту:

11 и позлатиши его златом чистым, внутрьуду и внеуду позлатиши его, и сотвориши верху его венец злат витый окрест:

12 и слиеши ему четыри колца злата, и возложиши на четыри страны его, два колца на едину страну, и два на другую страну.

13 Сотвориши же носила от древа негниюща и позлатиши я златом чистым:

14 и вложиши носила в колца, яже на странах кивота, носити ими кивот:

15 в колцах кивота да будут носила не зыблющеся:

16 и вложиши в кивот свидения, яже дам тебе.

17 И да сотвориши очистилище покров от злата чиста, двою лактий и пол в долготу, лактя же и пол в широту:

18 и сотвориши два херувима злата изваянна, и возложиши я от обоих стран очистилища:

19 да сотворятся херувими, един от страны сея и другий от страны другия очистилища, и сотвориши два херувима на обоих странах:

20 да будут херувими распростирающе крила верху, соосеняюще крилами своими над очистилищем, и лица их ко другъдругу, на очистилище будут лица херувимска:

21 и да возложиши очистилище на кивот верху, и в кивот да вложиши свидения, яже дам тебе.

22 И познан буду тебе оттуду, и возглаголю тебе с верху очистилища между двема херувимы, иже суть над кивотом свидения, и по всем, елика аще заповем тебе к сыном израилевым.

23 И сотвориши трапезу от древ негниющих, двою лактий в долготу, и лактя в широту, и лактя и пол в высоту:

24 и позлатиши ю златом чистым, и сотвориши ей витое обложение златое окрест, и сотвориши ей венец длани окрест,

25 и сотвориши витое обложение венцу окрест.

26 И сотвориши четыри колца злата, и возложиши четыри колца на четыри страны ног ея под венец:

27 и да будут колца на влагалища носилам, яко воздвизати ими трапезу.

28 И сотвориши носила ея от древ негниющих, и позлатиши я златом чистым, и воздвизатися будет на них трапеза.

29 И сотвориши блюда ея и фимиамники, и возливалники и чашы, имиже возливати будеши: от злата чиста да сотвориши я.

30 И возлагати будеши на трапезу хлебы предложения предо мною присно.

31 И да сотвориши светилник от злата чиста, изваян да сотвориши светилник: стебль его и ветви, и чашы и крузи и крины от него да будут:

32 шесть же ветвий исходящих от стран, три ветви светилника от страны его единыя и три ветви светилника от страны вторыя:

33 и три чашы во образ ореха, на единей ветви круг и крин: тако шести ветвам исходящым от светилника:

34 и на светилнике четыри чашы во образ ореха, на единей ветви крузи и крины его:

35 круг под двема ветвми от него, и круг под четырми ветвми от него: тако шести ветвам исходящым от светилника: и на светилнике четыри чашы во образ ореха:

36 крузи и ветви от него да будут: весь изваян от единаго злата чиста.

37 И да сотвориши светил его седмь, и поставиши светила его, и светити будут от единаго лица его:

38 и щипцы его, и подставы его от злата чиста сотвориши:

39 талантом злата чиста да сотвориши вся сосуды сия.

40 Виждь, да сотвориши по образу показанному тебе на горе.

Глава 26

1 Скинию же да сотвориши от десяти опон от виссона сканаго и синеты, и багряницы и червленицы сканыя: херувимы делом тканым да сотвориши я.

2 Долгота опоны единыя двадесять и осмь лактий, и широта четырех лактий, опона едина да будет: мера таяжде да будет всем опонам.

3 Пять же опон да будут взаим придержащяся едина от другия, и пять опон да будут содержащяся друга о друзей.

4 И да сотвориши им петли из синеты у края опоны единыя, от единыя страны в сложение: и сице сотвориши на краю опоны внешния к сложению второму.

5 Пятьдесят же петлей сотвориши единей опоне, и пятьдесят петлей да сотвориши от края опоны по сложению вторыя, лицем к лицу сходящыяся между собою каяждо.

6 И сотвориши пятьдесят крючков златых и совокупиши опоны едину ко друзей крючками: и будет скиния едина.

7 И да сотвориши опоны власяныя в покров над скиниею, единонадесять опон сотвориши их.

8 Долгота опоны единыя да будет тридесяти лактий, и четырех лактий широта опоны единыя: таяжде мера да будет единонадесяти опонам.