Типикон - Сборник

И нам отвещающим: Аминь. Начинает настоятель с прочими служители, велегласно настоящий тропарь, во глас 5: Христос воскресе из мертвых, смертию смерть поправ, и сущим во гробех живот даровав. И мы тойже поем подобне, со сладкопением. Поется же сей тропарь трижды от настоятеля, и трижды о нас. Таже настоятель глаголет стихи: 1–й: Да воскреснет бог, и расточатся врази его. И на кийждо стих мы поем тропарь: Христос воскресе: весь по единожды. 2–й стих: яко исчезает дым, да исчезнут. Христос воскресе: единожды. Третий: Тако да погибнут грешницы от лица божия: Христос воскресе: единожды. Четвертый: Сей день, егоже сотвори господь: Христос воскресе: единожды. Слава, Христос воскресе: единожды. И ныне, Христос воскресе: единожды. Таже настоятель поет вышшим гласом: Христос воскресе из мертвых, смертию смерть поправ. И отверзает врата. Входит настоятель с честным крестом, предыдущим ему со двема лампадами: И братиям поющим: И сущим во гробех живот даровав. Таже ударяют во вся кампаны, и клеплют довольно, три звоны. Вшед же настоятель со иереи во святый олтарь: И диакон глаголет ектению великую: Миром господу помолимся. Возглас: яко подобает тебе всякая слава: И начинает предстоятель канон, творение Господина Иоанна дамаскина, глас 1–й. ирмос: воскресния день: ирмосы на 4: тропари же на 12, с припевы, Христос воскресе: И паки последи кийждо лик ирмос. Последи же на сходе катавасиа, ирмос тойже: воскресния день: И но нем, Христос воскресе: трижды. Творит же начало канона на куюждо песнь всегда предстоятель, десной или левой стране случившейся начати. И кадит в начале канона святыя иконы, и оба лики, и братию по чину. И по коейждо песни бывает ектениа малая вне олтаря, якоже рехом, во святый сей день. Возглас внутрь олтаря от иереа: яко твоя держава: По 1–й песни, поет десная страна. По 3–й же поет левая. Сице поем и по прочих песнех. По 3–й песни, возглас: яко ты еси Бог наш:

Таже ипакои, глас 4: Предварившия утро яже о марии, и обретшия камень отвален от гроба, слышаху от ангела: во свете присносущнем сущаго с мертвыми что ищете яко человека? видите гробныя пелены, тецыте и миру проповедите, яко воста господь, умертвивый смерть: яко есть сын бога спасающаго род человеческий.

И чтение в григории богослове, егоже начало: На стражи моей стану: По чтении же, паки вжигают свещи братия. По 4–й песни, ектениа, и возглас: яко благ и человеколюбец Бог еси: По 5–й песни, возглас: яко святися и прославися пречестное и великолепое имя твое: По 6–й песни, возглас: Ты бо еси царь мира, и спас душ наших: Кондак, глас 8: Аще и во гроб снизшел еси безсмертне, но адову разрушил еси силу, и воскресл еси яко победитель Христе Боже, женам мироносицам вещавый: радуйтеся, и твоим апостолом мир даруяй, падшим подаяй воскресение.

И икос. И чтем синаксарий.

Таже глаголем: воскресение христово видевше, поклонимся святому господу Иисусу. единому безгрешному. кресту твоему покланяемся Христе, и святое воскресение твое поем и славим: ты бо еси Бог наш, разве тебе иного не знаем: имя твое именуем. приидите вси вернии, поклонимся святому христову воскреснию: се бо прииде крестом радость всему миру, всегда благословяще Господа, поем воскресение его: распятие бо претерпев, смертию смерть разруши. трижды.

Посем стихира, глас 6: воскресе Иисус от гроба, якоже прорече, даде нам живот вечный, и велию милость. трижды.

Таже поем прочия 3 песни. По 6–й песни, ектениа малая. Возглас: Буди держава царствия твоего: По 8–й песни возглас: яко благословися имя твое: На 9–й песни, поем припевы праздника пасхи, по ней же ектениа, и возглас: яко тя хвалят вся силы небесныя: Светилен: Плотию уснув: трижды. На хвалитех, Всякое дыхание, на глас 1. ставим стихи 4, и поем стихиры. воскресны, глас 1. Поем твою Христе: и прочих 3. Таже сошедшеся оба лика вкупе, поем стихиры пасхи, глас 5, с припевы их: Да воскреснет бог, и расточатся врази его. Пасха священная нам днесь показася: И прочия 3 стихи: Слава, и ныне, глас тойже: воскресния день: таже, Христос воскресе: И поем сие многажды, дондеже целует братия друг друга. Целование же настоятеля с прочими иереи и диаконы, во святом олтаре бывает сице: глаголет приходяй: Христос воскресе. Оному же отвещавшу: Воистинну воскресе. Посем взем настоятель честный крест, и станет вне пред святыми царскими дверьми. Такожде и вси священницы, елико их есть, и диаконы, вземше кийждо их святое евангелие, и честныя иконы, по чину своему. И станут вси рядом, от десныя страны настоятеля. И приходят прежде честнейшии церковницы, и старцы, един по единому. И мало преклоняются пред настоятелем. И целуют кийждо их честный крест, и святое евангелие, егоже держит иерей, и прочия образы. Таже и самого настоятеля во уста целуют, глаголюще: Христос воскресе. Оному же отвещавшу: Воистинну воскресе. По тому же образу и иереев целуют, и сами между собою, по чину своему. И ставятся от иереев по десной стране рядом. Таже по них и миряне такожде целование творят. Работницы же монастырстии в томже чину да станут, и друг друга целующе. Бывает же посреди во всех велие молчание. По целовании же чтется огласительное слово златоустаго от настоятеля, или екклисиарха: Аще кто благочестив, и боголюбив: Не седим же на сицевом чтении, но стояще слушаем вси. Таже глаголется тропарь святаго, глас 8: уст твоих: Посем диакон глаголет ектении: Помилуй нас Боже: и Исполним утреннюю молитву нашу господеви. И по возгласе, диакон: Премудрость. Мы же, благослови. Настоятель, Сый благословен Христос Бог наш: И мы, Аминь. утверди Боже: Посем настоятель держя крест, вместо, Слава тебе Христе Боже: поет, Христос воскресе из мертвых, смертию смерть поправ. И мы поем: И сущим во гробех живот даровав. И абие настоятель глаголет отпуст: Христос воскресый из мертвых, смертию смерть поправый, и сущим во гробех живот даровавый: истинный Бог наш, и прочая. Таже крест возвышая глаголет: Христос воскресе. трижды. Мы же отвещаем: Воистинну воскресе. трижды. Таже поем конечное: Христос воскресе: трижды, весь тропарь. И по нем пением кончим: И нам дарова живот вечный, покланяемся его тридневному воскреснию. Посем многолетны. И целуем честный крест держимый в руку настоятеля. И час 1–й глаголем: Христос воскресе, трижды. воскресение христово: трижды. Таже впакои, единожды: Предварившия утро: Таже кондак, единожды: Аще и во гроб:

Таже и сей тропарь единожды: Во гробе плотски, во аде же с душею яко бог, в раи же с разбойником, и на престоле был еси Христе со отцем и духом, вся исполняяй неописанный.

Слава: яко живоносец, яко рая краснейший воистинну, и чертога всякаго царскаго, показася светлейший Христе гроб твой, источник нашего воскресния.

И ныне, богородичен: Вышняго освященное божественное селение, радуйся, тобою бо дадеся радость, Богородице зовущим: благословена ты в женах еси всенепорочная владычице.

Таже, Господи помилуй, 40. Слава, и ныне: честнейшую херувим: Именем господним благослови отче. иерей стих: молитвами святых отец наших: Мы же речем, Аминь. И паки глаголем подобне: Христос воскресе: трижды. Слава, и ныне, Господи помилуй, трижды. благослови, и отпуст перваго часа. Сим же образом поется за 3–й, за 6–й пред литургиею, такожде и пред вечернею за 9–й час, и за повечерие. Такожде и за полунощницу.

[Смотри] Аще ли когда по нужде не будет литургии: Вместо изобразительных глаголем сице: Христос воскресе: трижды. воскресение христово: единожды. Посем, Предварившия утро: Слава, кондак: Аще и во гроб: И ныне, единородный сыне: Посем блаженна от канона, песнь 3 и 6. иерей, Премудрость. Чтец надписание апостола, и самое чтение. Посем иерей евангелие. Таже, Помяни нас Господи: Лик небесный: И посем: Верую во единаго бога: ослаби, остави: И по Отче наш: кондак: Аще и во гроб: Слава, и ныне, богородичен: Вышняго освященное: Господи помилуй, 40. Таже, един свят, един Господь Иисус Христос, во славу бога отца, аминь. И посем вместо, Буди имя господне, Христос воскресе: трижды. Таже псалом, благословлю Господа на всякое время: Конец: Не лишатся всякаго блага. И посем отпуст: и исходим в трапезу.

Подобает ведати, како поется молебен на святую пасху:

иерей глаголет: благословен Бог наш: И мы, Аминь. Таже иерей, Христос воскресе: трижды. Таже, Христос воскресе: трижды, на лики, якоже предызъявися в начале утрени. По Слава, и ныне, иерей глаголет: Христос воскресе из мертвых: Мы же, И сущим во гробех живот даровав. Таже, Слава, и ныне, впакои: Предварившия утро: Аще ли хощеши приложити канон коего святаго: Тогда глаголи прежде тропарь святаго, единожды: Слава, и ныне: Предварившия утро: Посем канон пасхи, со ирмосом на 6. Припев, Христос воскресе: и святаго, аще будет, на 4. Катавасиа, по 3–й и 6- й песни: спаси от бед: По 6–й песни, кондак и икос пасхи. Таже прокимен, глас 8: Сей день, егоже сотвори господь: Стих: Исповедайтеся господеви: Таже святаго прокимен. евангелие луки, зачало 114. Потом святаго. По 9–й песни, за Достойно, ирмос: Светися, светися: Таже, Христос воскресе: трижды: Посем впакои: Предварившия утро: Слава, тропарь святаго. И ныне, кондак: Аще и во гроб: Таже, ектениа, Помилуй нас Боже: Посем иерей глаголет, Премудрость. Мы же, Христос воскресе: трижды. Таже иерей вместо: Слава тебе Христе Боже: Христос воскресе из мертвых: И мы: И сущим во гробех живот даровав. И отпуст со крестом глаголет сице: Христос воскресый из мертвых: И прочая, яко предписася в конце утрени. Посем возглашает: Христос воскресе, трижды. Мы же отвещаем: Воистинну воскресе, трижды. И паки поем: Христос воскресе: трижды. Таже, Господи помилуй, трижды, с пением.